我越嚟越相信，照顧媽咪嘅工作，主要係照顧佢嘅情緒。要了解媽咪嘅情緒，就要認識佢嘅過去。

由細到大，媽咪喺我心目中嘅形象都係高高在上，好堅好硬淨，一個人撐起頭家，為我哋遮風擋雨。直到我長大之後，就好似一隻雀仔咁，由雀籠飛走，之後就好少理屋企嘅嘢。媽咪就係媽咪，我從來冇認真諗過要認識呢個人。

老人家講嘢重重複複，媽咪講好多故仔，我都聽過好多次，但係直到近幾年，我先至開始認真去諗媽咪想講乜嘢。慢慢我就發現，媽咪做人感覺好委屈。

例如媽咪同老竇不和，佢話老竇冇俾家用，但老竇就同隔籬鄰舍講佢俾咗幾多家用，呢啲事令媽咪感覺好委屈。

又例如，媽咪當年供我同細佬讀書，隔離鄰舍話我哋屋企咁窮，就唔好再俾細路讀書。媽咪感覺委屈，直到我同細佬入咗大學，佢先至覺得威番一鋪。

其實媽咪係一個自尊心重，又敏感嘅人，所以佢做人都幾唔開心，佢嘅負面情緒主要就係呢啲委屈。