陪媽媽落街食魚蛋粉，到達商場門口，看見一位婆婆，眼神迷惘，「頭昂昂」望向商場天花板，一會兒又低頭望向左，轉過頭又望向右，不知如何是好。

「阿婆好似蕩失路。」媽媽觀察力强。

「站在商場門口，可能是等人。」我有不同看法。

「她表情好古怪，似搵路搵唔到，問多句冇壞。」媽媽比我勇敢，已走向阿婆，我跟著。

「婆婆，係咪想去買餸呀？」媽媽以搭訕口吻，想免卻婆婆尷尬。

「哎呀！唔係呀。我想返屋企，我唔知點樣行，你幫幫我，好嗎？」婆婆惶恐，有點亂，急著說。

「婆婆，你定定先，慢慢講，你屋企地址係邊度？」

「……哎吔！我唔記得咗，點算呀！」婆婆努力地想，洩氣地說。

「你有冇帶電話呀？」

「我冇電話㗎，我邊到識用吖。」

「你記唔記得屋企人的電話號碼？」

「9……」婆婆只說了一個數目字。

「屋企的電話號碼知道嗎？」

「……」婆婆可能太驚，答不上來。

「身上或者銀包有冇寫下屋企人的聯絡方法？」

「……」婆婆非常惆悵，都是答不出來。

「婆婆，不如我陪你去警署，好嗎？」

「…… 你會陪著我嗎？」婆婆有點猶疑。

「不用驚，我們一起去。」

到達警署。

「阿Sir，婆婆唔識路返屋企，你們幫幫她。」媽媽講述發現婆婆的經過。

「我們會跟進，你們可以走了。」

「不用落口供？」

「不用。多謝你們帶婆婆來警署，麻煩你們了。」

原來，帶走失長者到警署就完成任務了，毋須落口供。

離開警署。

「我未必夠胆上前去問阿婆。」我向媽說。

「問下無壞嘅，如果錯咗，講聲對唔住就得，否則，婆婆行去荒蕪地方無人幫就慘了。」