「得啦，冇嘢呀！」

「冇嘢呀，少少喉嚨痛之嘛，兩聲咳囉！」

「冇乜嘢吖，發燒啫！」

對於染疫老竇的回應，電話聽筒另一邊的Alvin，不禁無奈，盡量心平氣和地追問：「咁發燒幾多度呀？」

「30幾度囉，冇嘢呀！」老竇繼續努力地報平安。

Alvin苦笑：「即係幾多度啫？你影張相俾我睇啦。」

終於相片傳來，探熱針顯示數字「38.8」，Alvin愕然。他受訪時苦笑：「當然佢直接講出嚟係最好，但都體諒老人家只係唔想人哋擔心，所以嬲唔落。」

老竇65歲作為退休消防員，雖然患有心臟病及高血壓，仍是所有人眼中的硬漢，從不主動求援。

他在兩星期前經快速測試確診後，首先擔心的是影響Alvin的工作安排：「咁你返工點算呀？」Alvin三番四次保證自己可在家上班後，老竇才放下心來。

有親戚願意借出空置住所，讓老竇暫住隔離，為免影響家人，他也堅持搬走。

Alvin尊重老竇的決定，立即為他打點日常用品及藥物，然後連人帶物資「打包」去隔離。Alvin笑言，從此自己便展開偵探般的日子，需要旁敲側擊地了解老竇病況，不能放過蛛絲馬跡。既然老竇不主動，做兒子的更要加倍積極。

他不厭其煩地每天查問病徵：「因為佢好少講自己，我問佢點呀，佢次次都話：『冇嘢呀，少少唔舒服之嘛！』咁我咪睇返網上啲人點講，有咩主要symptoms，逐樣問佢有冇。例如有冇流鼻水？有冇咳？有冇喉嚨痛？然後幫佢配藥」。

其次是佈下綫人，「有親戚攞嘢上去，就叫佢哋睇吓老竇精唔精神，從第三方角度判斷佢嘅真實情況係點，而唔係從佢口中得悉，因為佢實話冇事。」為免頻密問候令老竇厭煩，Alvin更不惜出動遠在日本留學的表弟，「叫表弟同老竇FaceTime，望吓佢精唔精神，講嘢清唔清楚呀嘛」。

最後，亦是最重要的一點，便是細心觀察。

發病首兩天，老竇持續發高燒，但仍堅持沒有大礙 ：「30零度，OK啦！冇乜嘢！」Alvin不放心，苦笑謂：「知佢咩料啦。」他唯有要求老竇每天將探熱針的照片拍下來，監察其體溫，並提醒定時服用撲熱息痛、維他命C及飲水。染疫後期，他亦要求老竇每次進行快速抗原測試後拍照，「叫佢影清楚條線深定淺，睇吓病毒量高唔高，病情減退定惡化」。

雖然老竇依時服藥，但從不主動報告病情，Alvin只好把握每天的傾談時間，從細節位入手：「盡量傾耐少少，睇吓佢有冇流鼻水、有冇咳，或者聽吓佢有冇聲沙，就知佢有冇喉嚨痛。」視像鏡頭也是很好的調查工具，「如果喺video cam見到佢喺床頭邊擺咗個廁紙筒，咁咪知咩事囉，如果佢眼仔耷耷呀，就知佢發燒發得好勁。」

除了耳聽目測，Alvin還會暗中留意老竇的精神狀態：「譬如我哋逢初一十五會食齋，我特登唔提佢，睇吓佢記唔記得，咁就知佢精唔精神。」

終於老竇染疫兩星期後康復，一家團聚當晚第一件事，便是買料打邊爐：「雖然佢仲有幾聲咳，但唯有相信快測嗰一條線，總算鬆一口氣啦！」Alvin深呼吸，緊繃的臉上漸露笑顏。